Triste partenza !
Giovanni Giardina interpreta una poesia di Ruccio Carbone
Ma quantu t’amu , terra mia riarsa !
Quantu ti piensu e quantu ti disiu
‘nto mumientu cchiù tristu di l’addiu ,
quannu u vapuri è prontu ad assarpàri
e molla tutti i cavi da bbanchina !
U cori mi si strinci nicu nicu,
mi lassa senza sciatu, annichilùtu,
pari ca nuddu nuddu pensa a ttia
e ‘nvesci ‘nto mumientu di l’addiu
c’è sempri tanta ggenti ca ti penza.
e veni a salutariti a bbanchina.
E a navi janca parti !
E lassi u cori !
U giru fa alliversa ed u to mari
ti curri ‘ncuntru cumu na sirena,
ca pedda liscia di na notti i luna !
Mentri d’arriedu lassa sulu a scia
ca curr’appriess’all’elica e gghianchìa,
cumu na freccia ca mi signa a via
pi lassàrimi di puppa a terra mia !
