Giuvanninu ( Occhittu)

di Giovanni Giardina

Vu ricurdati a Giuvanninu “Occhittu”

ca ìa giriannu sulu strittu strittu ?

Dappressu purtàva un ligniscieddu e mani,

pirchì avia timùri sempri di cani .

 

Tutti u ‘nciuriavanu “Occhittu“

pirchì ‘nta l’uocchi avia un gran difiettu,

c’era cu passàva dirittu e nù uardàva

c’era cu si fermàva e u scuncicàva.

 

Ad apprufittàri c’eranu i carusi,

ca dd’uocchi ci parìanu curiusi ,

bastava co vidìanu assumàri,

ca subitu u cuminciàvanu a ‘nzurtàri !

 

Giuvanninu, appena i vidia avviscinàri,

cu lignu i cuminciàva a minazzàri,

chi dienti stritti e ddu lignu e mani :

Ci discìa :“ Vi nni vulìti iri i cca, gran figghi di buttani ? “

 

L’unicu cu aiutò e cci fisci pena,

fu u bummàru,…don Peppinu Arena

ca prima u livò da strata, e a puocu a puocu,

ci‘nzignò a sparàri u juocu i fuocu .

 

E i t’annu, cu i potti cchiù scugnàri ?

Pi anni continuarunu a sparàri !

Poi, quannu pi don Peppinu arrivò l’ura,

Giuvanninu si ritruvò tra quattru mura.

 

I quannu pirdù ddu gran benefattùri,

campò sulu c’aiutu du Signùri !

Poi, cu è co pò sapiri ?

O fu pirchì suffrìa, o fu a malicunia

si ricurdò i l’amicu, e cci iù a fari cumpagnìa !

 

 

Lipari – 12 – 01 – 2014 –