E’ un miraculu ! di Giovanni Giardina
Disci u piscaturi :
I tiempi pir mi si fisciru troppu duri,
cu tutti sti liggi, ‘un si pò cchiù piscàri,
è un miraculu, s’ancòra vaiu a mari
Disci u rigattieri :
Mi ricuordu cumu si fussi statu aieri,
quanta frischizza di lu nostru mari !
è un miraculu ,s’ancòra mi sienti vanniàri
Disci u muraturi :
Haiu avutu sempri fidi ‘nto Signuri,
cu travagghiu ? ‘nzerta e va a diritta,
è un miraculu , s’ancòra sugnu addritta.
Disci u mascellaiu :
Cacchi cosa i parti, iò ci l’haiu,
ma cu sta crisi,vinnu puocu e nenti ,
è un miraculu, s’ancòra haiu clienti.
Disci u panettieri :
Travagghiu sulu iò e me mugghieri,
prima sfurnàva pani, sira e matìna
è u miraculu, s’ancòra haiu a farina.
Disci u ristoranti :
Na vota clienti, iò nn’avìa tanti,
ora, cchiossà da mitàti l’haiu pirdùtu
è un miraculu, s’ancòra ‘un’haiu chiudùtu.
Disci a banca:
‘Un mi puozzu lamintàri, ma sugnu stanca,
grazii a sti quattru balordi
è un miraculu : s’ancòra tiegnu sordi
Disci u parrinu :
Iò usu sulamenti ,acqua, pani e vinu,
mi servunu pi putìri diri a missa
è un miraculu, s’ancòra veni a Criesia cacchi fissa
Disci u pensionatu :
E iò finu ad oggi unn’aiu statu ?
Ora vi sientu fari tutti sti lagni ?
E fin’ora c’atu fattu di guadagni ?
Sicunnu vuautri, cu è cchiù disgraziatu ?
Chiddu ca vinni, o cchiddu c’ha accattatu ?
Vuautri vi sapiti sulu lamintàri
ma nu pirditi mai, u viziu d’arrubbàri.
L’anzianu campa di palpitazioni,
cu scantu ca ci levanu a pinsioni
Iò pi diebiti chi haiu, sugnu pirdùtu
ed è un miraculu: s’ancòra ‘un’haiu murùtu!
